कितेक

दिसले फुलाफुलांचे असले थवे कितेक
गर्दीत ताटव्यांच्या मिटल्या कळ्या  कितेक

केलेत  वार ज्यांनी करूया सजा अशांना
त्यांच्या जुन्या गुन्ह्यांच्या पटल्या खुणा कितेक

जपल्या अनेक वर्षे निजवून पुस्तकात
हलक्या पिसाप्रमाणे या पाकळ्या कितेक

घुमती दिशाही दाही ज्यांच्या प्रतिध्वनींनी
उठती उधाणराती लाटा अशा कितेक

निःशब्द शांततेच्या उदरात जलसमाधी
घेतात वर्तुळे जी वलये अशी कितेक

वाटेकडेच डोळे बसली अजून लावून
डोळ्यांपलाड लपली स्वप्ने अशी कितेक